L'abitaziun custa sco emprim il tschains da locaziun mensil ch'è vegnì fixà en il contract da locaziun. Vitiers vegnan ils custs accessorics sco er ils custs per l'electricitad u per il gas, per ils attatgs da telefon, per las colliaziuns d'internet e per la televisiun a cabel.

Dals custs accessorics pon far part expensas per il stgaudament, per l'aua, per il pedel, per il mantegniment dal curtin, per l'aua persa, per la taxa per ils ruments e per ulteriuras chaussas. Ils custs accessorics ston adina esser menziunads e descrits exactamain en il contract da locaziun. Uschiglio n'èn tals betg admissibels. Ils custs accessorics vegnan repartids proporziunalmain sin las locatarias ed ils locataris. I dat er custs accessorics che na dastgan betg vegnir incassads da las locatarias e dals locataris.

Ina part dals custs accessorics pajais Vus per regla mintga mais ensemen cun il tschains da locaziun. Ins numna quai pajaments a quint. Almain ina giada per onn survegnis Vus in quint final. Sch'ils pajaments a quint èn pli bass ch'ils quints finals, stuais Vus pajar l'import restant. Sch'ils custs èn pli bass, vegn restituì l'import ch'è vegnì pajà da memia. Controllai detagliadamain il quint final. Quai po valair la paina.

Il deposit dal tschains da locaziun – er numnà cauziun – serva a la locatura u al locatur sco garanzia; per exempel sche Vus na pajais betg ils tschains da locaziun u ils custs accessorics ubain en cas da donns vi da l'abitaziun che Vus stuais pajar. Il deposit importa maximalmain trais tschains da locaziun mensils. La cauziun sto vegnir pajada da la locataria u dal locatari sin in conto da banca spezial (conto da deposit u da cauziun); quest conto vegn emess sin il num da la locataria u dal locatari. Per regla vegn il deposit restituì inclusiv ils tschains immediatamain, cur che Vus midais abitaziun. Deducids vegnan eventualmain tschains da locaziun averts e donns vi da l'abitaziun.

Igl è er pussaivel da far in contract per ina garanzia da cauziun per la locaziun tar in'assicuranza. Il deposit vegn alura pajà da l'assicuranza. Per questa prestaziun da servetsch ston vegnir pajadas contribuziuns annualas. L'avantatg è: Voss daners n'èn betg bloccads sin in conto da deposit e pon vegnir duvrads libramain. Il dischavantatg è: Vus pajais mintga onn ina taxa da plirs tschient francs. Il pli favuraivel èsi da pajar sez il deposit.