Sche Vus midais chasa entaifer la medema vischnanca, basti d'annunziar la nova adressa a Vossa controlla d'abitants. Sche Vus giais a star en in'autra vischnanca, stuais Vus per regla annunziar entaifer 14 dis Vossa partenza a la veglia vischnanca da domicil e Voss arriv a la nova vischnanca da domicil. En la gronda part da las vischnancas stuais Vus As preschentar persunalmain tar la controlla d'abitants. N'emblidai betg da prender cun Vus ils suandants documents:

• il passaport valaivel u la carta d'identitad valaivla
• il document da legitimaziun da persunas estras, premess che Vus hajas in tal, uschiglio ina fotografia da passaport
• l'attest d'origin, individualmain u per pèrs (l'attest d'origin As vegn consegnà da Vossa veglia vischnanca da domicil; in nov attest d'origin po vegnir empustà tar la vischnanca burgaisa)
• il certificat da famiglia, sche Vus avais uffants (copia)
• l'attest d'assicuranza d'ina cassa da malsauns svizra

Tenor la cunvegna davart la libra circulaziun da persunas valan per burgaisas e per burgais da la UE/AECL las medemas reglas sco per Svizras e per Svizzers. Las migrantas ed ils migrants d'in terz stadi che han ina permissiun da dimora ston s'infurmar a temp tar la controlla d'abitants da la vischnanca da domicil u tar l'autoritad chantunala da migraziun davart ils pass supplementars ch'ellas ed els ston far, sch'ellas ed els midan chasa. Quai vala spezialmain en cas d'ina midada da chantun, perquai ch'i basegna per regla ina nova permissiun da dimora per abitar en in auter chantun.

Ulteriurs posts che Vus duessas infurmar en cas d'ina midada:

• Posta: Vus pudais deponer tar l'uffizi postal ina incumbensa da trametter suenter Vossa posta.
• Electricitad, gas, aua: Infurmai las ovras responsablas davart Vossa midada da chasa per che quellas possian far il quint final.
• Telefon: Infurmai Vossa societad da telefon per che quella possia midar il telefon, l'attatg d'internet ed eventualmain la televisiun digitala.
• Scola: Sche Vus avais uffants, infurmai la persuna d'instrucziun e las autoritads da scola davart la midada da chasa.