La Svizra è situada en il center da l'Europa occidentala. Mintgatant din ins er ch'ella saja ina insla. Manegià cun quai è ina insla entamez l'Uniun europeica (UE). Ella sezza n'è betg commembra da la UE, ma quasi tut ses pajais vischins, numnadamain: la Germania, la Frantscha, l'Italia e l'Austria. En Svizra sa scuntran trais grondas regiuns linguisticas da l'Europa: las linguas tudestg, franzos e talian.

 

Tras sia situaziun centrala en l'Europa occidentala gioga la Svizra ina rolla decisiva en connex cun il traffic sin via e cun il traffic da viafier. Ina da las colliaziuns las pli impurtantas tranter il nord ed il sid maina sur e tras las Alps da la Svizra: il Gottard.

 

Cun ina surfatscha da circa 41 300 km2 fa la Svizra part dals stadis pitschens da l'Europa. Ella è cumparegliabla cun il Danemarc e mez uschè gronda sco l'Austria. En Svizra vivan passa 8,5 milliuns persunas. Passa 60 pertschient da las persunas en Svizra han tranter 20 e 64 onns. (Funtauna: uffizi federal da statistica, stadi 2018).

 

CH signifitga Confoederatio Helvetica. Quai è la denominaziun latina per confederaziun svizra. Questa denominaziun uffiziala han ins introducì suenter avair creà il stadi federal. Per betg preferir ina da las quatter linguas uffizialas, sa cloma la plachetta da naziunalitad da la Svizra perquai CH.