Per persunas estras en Svizra èsi pussaivel d'acquistar il dretg da burgais svizzer. Ma quai na capita betg automaticamain e pretenda l'adempliment da differentas premissas da vart da la confederaziun, dal chantun sco er da la vischnanca da domicil.

En la procedura ordinaria da natiralisaziun èn participads la vischnanca, il chantun e la confederaziun. Sche tut las premissas èn ademplidas, ha il secretariat da stadi per migraziun il dretg da conceder la permissiun federala da natiralisaziun.

En Svizra enconuschan ins ultra da quai la natiralisaziun facilitada. Quella vala sut tschertas premissas per conjugalas estras da Svizzers resp. conjugals esters da Svizras sco er per uffants d'in genitur svizzer, ils quals na possedan betg anc il dretg da burgais svizzer. Cumpetenta per la natiralisaziun facilitada è unicamain la confederaziun.

Nua stoss jau far la dumonda?

L'emprim post da consultaziun per ina natiralisaziun regulara u facilitada è Vossa vischnanca da domicil. Là survegnis Vus tut las infurmaziuns e tut ils formulars necessaris. Ulteriuras infurmaziuns chattais Vus er sin la pagina d'internet da l'uffizi da migraziun e da dretg civil dal Grischun.