L'integraziun survegn dapli pais tant en la nova Lescha federala davart las persunas estras e l'integraziun (LEI) sco er en la nova legislaziun federala davart il dretg da burgais svizzer (LDB; ODB). Ils criteris d'integraziun cumpiglian er las cumpetenzas linguisticas. Per tschertas proceduras da permissiun da la polizia da persunas estras sco er per la natiralisaziun ston quellas vegnir cumprovadas cun in certificat da linguas uffizial. Tge pretensiuns che valan e co che la cumprova linguistica po vegnir furnida, As declera l'Uffizi da migraziun e da dretg civil dal Grischun.

Cun la cumprova linguistica fide pon ins cumprovar las cumpetenzas linguisticas a bucca ed en scrit dals nivels A1 – B1 en las linguas naziunalas svizras tudestg, franzos e talian.

En tut las regiuns da la Svizra datti instituziuns da cumprova accreditadas che realiseschan pliras giadas per onn la cumprova linguistica fide.

Suenter avair absolvì la cumprova linguistica fide survegnis Vus il passaport linguistic. Quel cuntegna en moda separada Vossas cumpetenzas linguisticas a bucca ed en scrit.

Sche Vus avais gia in certificat da linguas renconuschì, pudais Vus inoltrar quel al secretariat fide. Il passaport linguistic As vegn tramess cunter ina taxa.

Tgi che dispona da cumpetenzas linguisticas dal nivel B1 e pli aut e che po er cumprovar quai, ha la pussaivladad d'acquistar in passaport linguistic sur il dossier da validaziun.

Infurmaziuns pli detagliadas en chaussa chattais Vus sin il portal d'internet fide.