La scursanida AI stat per assicuranza d'invaliditad. Sper la AVS è ella in'ulteriura assicuranza sociala impurtanta en Svizra. Sco invalida vala ina persuna, sch'ella na po betg pli lavurar per in temp pli lung (almain 1 onn) u per adina, e quai pervia d'in donn da sanadad corporal, psichic u mental.

La AI ha en emprima lingia l'incumbensa da reintegrar las persunas assicuradas pertutgadas en la vita professiunala. Latiers tutga in'entira retscha da mesiras d'integraziun. Mo sche quellas na mainan betg a la finamira, paja la AI ina renta a las persunas assicuradas.