La 1. pitga da la prevenziun da vegliadetgna è la AVS. Ella funcziuna tenor il princip dal sistem da repartiziun. La generaziun che lavura paja las rentas da las persunas pensiunadas. Per amplifitgar la renta da la AVS datti la 2. pitga, la prevenziun professiunala. Ella funcziunescha tenor il princip dal spargnar preventiv: Vus pajais contribuziuns e survegnis a partir da la pensiun ina renta che sa drizza tenor ils imports che Vus avais pajà.

Las bleras differentas cassas da pensiun ed assicuranzas organiseschan la prevenziun professiunala. Analogamain a la AVS èn tut las lavurantas emploiadas ed ils lavurants emploiads assicurads obligatoricamain tar ina cassa da pensiun. I dat però er excepziuns, per exempel, sche Vus gudagnais main che 21 150 francs per onn (stadi dal schaner 2016). Per persunas cun activitad da gudogn independenta n'è la prevenziun professiunala betg obligatorica. Ellas pon dentant s'assicurar facultativamain tar ina cassa da pensiun. Savens organiseschan las federaziuns da branscha ina tala cassa per persunas cun activitad da gudogn independenta.

Vus survegnis mintga onn da Vossa cassa da pensiun in extract che cuntegna tranter auter infurmaziuns davart l'import che Vus avais gia spargnà e davart la renta che Vus survegnis cun quests daners. L'entir import da daners pudais Vus As laschar pajar ora sut tschertas cundiziuns: per exempel, sche Vus bandunais la Svizra per adina ubain sche Vus fundais in'atgna firma. Avant che Vus faschais in tal pass, As duessas Vus laschar cussegliar bain.