En partenadis poi dar conflicts e crisas per differents motivs, per exempel sche differents interess u differentas ideas davart finamiras resp. valurs dals partenaris vegnan confruntads in cun l'auter. Co che conflicts vegnan dumagnads, divergescha d'uman ad uman e da pèr a pèr. I dat posts da cussegliaziun spezials che gidan pèrs en situaziuns da conflict a chattar ina soluziun.

En famiglias poi mintgatant dar situaziuns difficilas ed engrevgiantas, per exempel sch'i dat savens dispita tranter ils geniturs ed ils uffants u sch'in commember da la famiglia sa chatta en ina situaziun da vita difficila. Sche quai è il cas pon geniturs ed uffants dumandar agid cun sa drizzar a las instituziuns da cussegliaziun correspundentas. Il clom d'urgenza per geniturs porscha a geniturs cussegliaziun e sustegn durant 24 uras en cas da dumondas pertutgant l'educaziun ed il svilup da l'uffant u sch'i smanatscha il privel ch'ils geniturs u insatgi auter pudess daventar violent envers l'uffant. La cussegliaziun è gratuita e vegn dada per telefon 0848 35 45 55.

Il numer d'urgenza 147 da la Pro juventute gida uffants e giuvenils en cas da dumondas, problems ed en situaziuns d'urgenza. Da tuttas uras, di e notg. Sur telefon, SMS, chat, e-mail e webservice.