La furmaziun è d'ina impurtanza decisiva per las pussaivladads da sa participar a la vita economica e sociala. Perquai èsi impurtant che giuvenils da lingua estra che han absolvì lur temp da scola obligatoric gia en il pajais d'origin e che arrivan en Svizra sin fundament d'ina reuniun da la famiglia, chattian l'access al sistem da la furmaziun professiunala.

Per che l'entrada reusseschia, ston esser ademplidas tschertas premissas: enconuschientschas da basa da scola, en spezial en ils roms tudestg e matematica, sco er cumpetenzas persunalas sco tecnicas d'emprender e da lavur, l'abilitad da s'organisar e strategias per schliar problems.

Purschidas da furmaziun che tegnan quint spezialmain dals basegns da giuvenils da lingua estra sustegnan quels sin lur via ad ina soluziun transitorica u ad in emprendissadi.