Uffants pitschens dovran assistenza, tgira, nutriment saun, moviment, contact cun auters uffants, avunda sien, segirezza e charezza. Els dovran dentant er impuls e promoziun sco preparaziun per la scola e per la vita posteriura.
Prendai regularmain temp per Voss uffant. Al raquintai ina istorgia, chantai cun el ina chanzun u guardai cun el in cudesch da maletgs. Er durant spassegiadas pon ins scuvrir ed emprender bleras chaussas novas. Giai er savens cun Voss uffant sin la plazza da giugar, per ch'el possia giugar e siglir enturn cun auters uffants. Cun baterlar e cun giugar emprendan ils uffants fitg bleras chaussas ch'èn impurtantas per lur svilup e pli tard per il success en scola: tadlar, s'exprimer, observar, s'orientar, sa concentrar.
Tras quai che Voss uffant scuvra il mund, gioga cun auters uffants, chanta, taidla istorgias, scuvra la natira e sa mova, fa el experientschas ch'èn impurtantas pli tard en scolina ed en scola.
En il Grischun existan tranter auter las suandantas purschidas da promoziun tempriva:
- nudar per pops
- gruppas da ruschnar
- gimnastica per mammas e pitschens u per babs e pitschens
- chantar per geniturs ed uffants
- canortas da gieu e canortas da guaud
- ritmica musicala
As infurmai tar auters geniturs u tar Vossa vischnanca da domicil davart las purschidas en la regiun.
