Violenza envers uffants è scumandada en Svizra. Plinavant han culps e fridas mo effects negativs: La relaziun envers l'uffant vegn disturbada duraivlamain. L'uffant sviluppa disfidanza e sentiments da deblezza. La stima da sasez è blessada tras ils culps e la confidenza en sasez è indeblida. Forsa pensa l'uffant che l'applicaziun da violenza saja ina soluziun en cas da conflicts e cumenza a pitgar er auters uffants. Ir enturn cun uffants pitgads è per il solit difficil. Quests uffants han dapli problems u difficultads corporalas e psichicas en scola.

Culps e fridas na fan pia nagin senn. I po capitar ch'il maun d'ina mamma u d'in bab «glischna or» en in mument da stress. Impurtanta è la reacziun che suonda. Geniturs pon sa stgisar. En in mument quiet pon els discurrer ensemen cun l'uffant davart ils motivs che han chaschunà la situaziun e ponderar cuminaivlamain ina meglra reacziun per ina proxima giada.

Il post da cussegliaziun Clom d'urgenza per geniturs porscha durant 24 uras per di agid e cussegliaziun a geniturs, a famiglias ed a persunas da referiment en situaziuns d'urgenza u en cas da dumondas davart il tema educaziun e svilup da l'uffant. La cussegliaziun per telefon u per e-mail è gratuita. Telefon 0848 35 45 55.