Sco emprim ston ils giuvenils s'infurmar, nua che plazzas d'emprendissadi vegnan purschidas. Els las chattan tranter auter en l'indicatur da las plazzas d'emprendissadi dals chantuns, sin las paginas d'internet da las interpresas u en las gasettas quotidianas.

Al cumenzament poi esser util da contactar persunalmain u per telefon il manaschi d'emprendissadi. Lura suonda in'annunzia en scrit. Las persunas d'instrucziun e las cussegliaziuns professiunalas mussan als giuvenils, co ch'ins scriva in'annunzia e tge documents che ston vegnir agiuntads. Er ils geniturs duain sustegnair lur uffant uschè bain sco pussaivel en quest connex. Cussegls chattan ins er en l'internet.

Bunamain tut ils giuvenils – er sch'els han buns attestats – ston per il solit scriver bleras annunzias, fin ch'els chattan ina plazza d'emprendissadi; la purschida è numnadamain restrenschida. Quai vala oravant tut per scolaras e scolars cun nauschas notas. Las schanzas s'augmentan, sch'ils giuvenils tschertgan a medem temp ina plazza d'emprendissadi en pliras professiuns, pia betg mo en la professiun giavischada.

La tscherna da professiun e la tschertga d'ina plazza d'emprendissadi cumenzan gia il segund ultim onn da scola dal stgalim superiur. Durant quest temp pon ins er gia far fufragnadis.