L'assicuranza cunter accidents surpiglia ils custs per il tractament medical suenter in accident. Ultra da quai paja ella ina diaria (cumpensaziun da salari) en cas d'ina incapacitad da lavurar temporara resp. prestaziuns da rentas en cas d'ina incapacitad da lavurar permanenta u en cas da la mort.

Tut las lavurantas e tut ils lavurants ch'èn occupads en Svizra èn assicurads cunter accidents.

• Sche Vus lavurais 8 uras u dapli per emna tar ina patruna u tar in patrun: lura essas Vus assicurada u assicurà cunter accidents da lavur e cunter uschenumnads accidents ordaifer la lavur (accidents che capitan sin il viadi da lavur ed en il temp liber).
• Sche Vus lavurais main che 8 uras per emna tar ina patruna u tar in patrun: lura essas Vus assicurada u assicurà mo cunter accidents da lavur e cunter accidents che capitan sin il viadi da lavur. Per accidents che capitan en il temp liber (p.ex. en il tegnairchasa) stuais Vus far in'assicuranza cunter accidents tar la cassa da malsauns.
• Persunas dischoccupadas che han il dretg da survegnir ina indemnisaziun da dischoccupaziun èn assicuradas obligatoricamain.

Betg assicuradas n'èn persunas senza activitad da gudogn, per exempel dunnas ed umens da chasa, uffants, studentas e students, persunas pensiunadas u persunas dischoccupadas che na survegnan betg pli l'indemnisaziun da dischoccupaziun. Questas persunas ston far obligatoricamain in'assicuranza cunter accidents tar la cassa da malsauns.

Uschia agis Vus correctamain en cas d'in accident: Annunziai l'accident adina immediatamain a Vossa patruna u a Voss patrun ubain a la cassa da malsauns. Il formular per quai survegnis Vus da Vossa patruna u Voss patrun ubain da Vossa cassa da malsauns.