Memia pauc moviment po far vegnir malsaun. Las consequenzas pussaivlas èn mal il dies, surpais u malsognas dal cor e da la circulaziun (p.ex. infarct dal cor). As muvai perquai mintga di durant almain ina mesa ura en moda activa. Per exempel cun chaminar svelt, cun ir cun velo, cun lavurar en iert u en chasa. Las 30 minutas pudais Vus er divider en 3 giadas 10 minutas per di. Pigliai la stgala empè dad ir cun l'ascensur u cun la stgala rullanta. Uschia faschais Vus ch'il moviment saun daventa ina part integrala da Voss mintgadi.

Er nudar, far walking, currer u sautar è fitg saun. Ir a spass u trenar a l'aria frestga ha er in effect positiv per il stadi d'anim: suenter pon ins sa schluccar meglier e sa senta meglier.

Quest tip po er far plaschair ad uffants: Faschai ina giada in vitaparcours. Quai èn vias en il guaud cun exercizis da gimnastica. Il vitaparcours è gratuit e s'adatta per tuts: principiantas e principiants, sportistas e sportists, persunas creschidas ed uffants.

Fitg impurtant: Er uffants stuessan sa mover almain in'ura al di. Las lecziuns da sport en scola èn perquai impurtantas. Dapli moviment survegnan ils uffants, sch'els prendan regularmain part d'ina uniun da sport, per exempel en in club da ballape.