Mintga persuna che abita, che lavura u che fa sias cumpras en Svizra, po esser obligada da pajar taglia. La taglia è ina taxa publica. Ella è la funtauna d'entrada la pli impurtanta dal stadi e permetta a quel d'ademplir sias incumbensas.

Ins enconuscha en Svizra in'entira retscha da differentas taglias. Las taglias directas tutgan tar las taglias las pli impurtantas per il stadi: taglia sin las entradas e sin la facultad sco er taglia sin il gudogn e sin il chapital.

Ultra da quai datti las taglias indirectas. Ellas cumpiglian la taglia sin la plivalur, las taglias sin il tubac, la taglia da chauns, la taglia chantunala sin vehichels a motor, la taglia sin lottarias e bleras autras. Tut tenor il gener da taglia vegnan ellas incassadas da las vischnancas, dals chantuns u da la confederaziun.