Il dretg svizzer na fixescha nagin salari minimal. Intgins contracts collectivs da lavur u contracts normals da lavur prevesan per tschertas gruppas professiunalas però salaris minimals. L'autezza dal salari vegn fixada a chaschun da l'engaschament tranter la patruna u il patrun e l'emploiada u l'emploià.

En cas ch'ina lavuranta u in lavurant è impedì senza culpa da prestar la lavur – sco en cas da malsogna, d'accident, da servetsch militar e.u.v. – prescriva la lescha che la patruna u il patrun sto pajar vinavant il salari durant in tschert temp. Quant ditg che quai è, dependa da la durada dal contract da lavur; l'obligaziun da pajar vinavant il salari cumenza però pir a partir d'ina durada dal contract da trais mais.