Sche Vus avais fatg bleras experientschas en il mund da lavur, ma sche Vus n'avais anc nagin diplom professiunal, As pudais Vus acquistar il diplom professiunal sur in'uschenumnada procedura per validar prestaziuns da furmaziun. U Vus pudais far in diplom professiunal sin la 2. via da furmaziun.

La validaziun da prestaziuns da furmaziun signifitga che Vus laschais documentar ed examinar Vossa savida actuala e Vossas experientschas d'in tschert champ da lavur. Vus stuais avair fatg experientschas en il mund da lavur da quest champ professiunal durant almain tschintg onns. Ussa pudais Vus laschar validar questas experientschas e cuntanscher uschia in diplom renconuschì da la confederaziun. En quest connex identifitgais, analisais e documentais Vus Vossa savida professiunala en in dossier. Expertas ed experts da la professiun giuditgeschan Voss dossier. Sche las cumpetenzas satisfan a las pretensiuns che vegnan premessas per il diplom professiunal, survegnis Vus l'attestat. Sch'i èn anc avant maun largias, las pudais Vus emplenir cun ina scolaziun cumplementara.

Ina persuna creschida po però er far in emprendissadi sin la 2. via da furmaziun. Er qua stuais Vus cumprovar experientschas en il mund da lavur d'in tschert champ professiunal durant almain tschintg onns. Ussa As stuais Vus però anc acquistar las enconuschientschas professiunalas teoreticas e las enconuschientschas da la furmaziun generala da l'emprendissadi, per exempel en ina scola professiunala correspundenta. Per emprendissadis frequents sco per exempel l'emprendissadi commerzial datti classas spezialas per persunas creschidas. Dal rest: Mintga onn fan en Svizra – suenter avair terminà las preparativas adattadas – passa milli persunas in examen final d'emprendissadi renconuschì da la confederaziun.