I vegn recumandà da tschertgar ina nova abitaziun sin pliras vias. Vus augmentais uschia considerablamain Vossas schanzas da chattar in'abitaziun.

• Internet: Abitaziuns libras èn publitgadas sin portals d'immobiglias. Ils criteris per la tschertga sco il lieu, il dumber da chombras u il tschains da locaziun As gidan a chattar abitaziuns adattadas. En l'internet chattais Vus er las adressas d'administraziuns d'immobiglias e da societads per la construcziun d'abitaziuns en Vossa regiun.
• Administraziuns: Dumandai in formular d'annunzia dad uschè bleras administraziuns d'immobiglias e societads per la construcziun d'abitaziuns sco pussaivel. Suenter che Vus avais inoltrà Vossa annunzia, vali la paina da s'infurmar regularmain. Telefonai u passai sche pussaivel persunalmain sperasvia.
• Gasettas: Abitaziuns libras èn er publitgadas en gasettas quotidianas, fegls da communicaziun communals u gasettas da quartier. As annunziai uschè baud sco pussaivel l'avantmezdi tar la locatura u tar il locatur. Quai augmenta Vossas schanzas.
• Inserats gratuits: En centers da cumpra ed en centers communals, en butias da quartier, en restaurants, en scolas u en ospitals datti er tavlas d'inserats. Vus pudais pender si là gratuitamain in inserat u tschertgar abitaziuns.
• Enconuschentas ed enconuschents: Per bler betg tut las abitaziuns libras vegnan publitgadas. Infurmai perquai Vossas parentas e parents, amias ed amis ubain collegas da lavur che Vus tschertgais ina abitaziun. Vus survegnis uschia eventualmain tips prezius.

Tgi che vul s'annunziar cun success per in'abitaziun, sto sa preparar bain e resguardar intgins puncts impurtants:

• Visitaziun da l'abitaziun: As preschentai punctualmain al termin. Faschai ina impressiun seriusa e simpatica. Quai gida spezialmain en cas da locaturas e da locaturs privats.
• Formular d'annunzia: Empleni il formular cumplainamain en moda netta e clera.
• Documents: Ensemen cun il formular d'annunzia stuais Vus inoltrar ulteriurs documents – per exempel la quittanza dals documents deponids (per Svizras e Svizzers), il document da persunas estras, in extract dal register da scussiun (quel survegnis Vus tar l'uffizi da scussiun da Voss lieu da domicil), il rendaquint dal salari u dals daners da dischoccupaziun, la disposiziun da la AI u da la AVS ed ina garanzia en scrit per il tschains da locaziun. Davart ils documents che vegnan pretendids As infurmescha la locatura u il locatur ubain l'administraziun. Inoltrai mo copias, nun ch'i vegnian pretendids expressivamain ils originals, sco per exempel tar l'extract dal register da scussiun.
• Brev accumpagnanta: Vus augmentais Vossas schanzas, sche Vus agiuntais a Voss documents ina brev persunala. As referi a l'inserat, As preschentai curtamain e motivai, pertge che Vus As interessais spezialmain per l'abitaziun.
• Persunas da referenza: Inditgai adina sche pussaivel persunas da referenza che mettan Vus en ina buna glisch – per exempel la patruna u il patrun ubain la locatura u il locatur d'enfin ussa.

Sche Vus As annunziais tar ina societad per la construcziun d'abitaziuns u tar in'administraziun d'immobiglias en general per in'abitaziun, menziunai en la brev accumpagnanta er la grondezza da l'abitaziun giavischada e l'import maximal dal tschains da locaziun.