Da princip vala: Cumenzai uschè baud sco pussaivel cun las preparativas. Ina midada da chasa dovra numnadamain bler temp e daners. Qua èn intgins puncts che Vus duessas resguardar:

• Fixai il termin da midada ed As cunvegni cun Vossa nova locatura u Voss nov locatur davart la data ed il temp exact, cur che Vus pudais retrair la nova abitaziun.
• Cun la locatura u il locatur da l'abitaziun veglia fixais Vus il termin da consegna per l'abitaziun.
• Infurmai Vossa patruna u Voss patrun davart il termin da midada e dumandai il di liber pajà per far midada (tut tenor patrun pon quai er esser 2 dis).
• Incumbensai ina interpresa da nettegiament per nettegiar l'abitaziun veglia. Sche Vus vulais far sezza u sez quai, duvrais Vus material per nettegiar (per exempel in apparat per nettegiar tarpuns). Vus pudais prender en locaziun in tal en ina drogaria, en in martgà da construcziun u tar ina firma per far midada.
• Sche Vus vulais transportar sezza u sez il tegnairchasa (mobiglias e stgatlas), duvrais Vus in vehichel da transport adattà, che Vus pudais prender en locaziun, e natiralmain gidantras e gidanters. Ubain che Vus incumbensais ina interpresa per far midada, quai che chaschuna sa chapescha custs.
• Vus duvrais er material d'emballadi. Vus stuais demontar las mobiglias e preparar quellas per il transport, pachetar la vestgadira ed ils objects dal tegnairchasa e.u.v. Stgatlas da chartun favuraivlas chattais Vus per exempel en inserats gratuits en l'internet u sin vischnanca.