Per ina convivenza paschaivla e buna en ina chasa da pliras famiglias èsi impurtant che las abitantas ed ils abitants prendian resguard in da l'auter. Per quai dovri tschertas reglas che tuts ston observar. Talas èn descrittas detagliadamain en l'urden da chasa. Qua sutvart chattais Vus intgins puncts impurtants:

• Ruaus da notg: El dura normalmain da las 22.00 fin las 7.00, il ruaus da mezdi da las 12.00 fin las 13.00. Durant quest temp ston la televisiun ed ils radios vegnir reglads ad in tun moderà ed activitads che fan canera èn scumandadas. Er las dumengias ed ils firads ston ins evitar da far canera. Tgi ch'envida amias ed amis ad ina festa, infurmescha il meglier ordavant sias vischinas e ses vischins.
• Plazzas e stanzas communablas: L'entrada, las stgalas, las plazzas da deponer rauba e vehichels, la lavandaria e.u.v. stattan a disposiziun a tut las locatarias e locataris. Na depositai betg atgnas chaussas sin questas plazzas u en questas stanzas e las tegnai nettas.
• Lavandaria: Observai strictamain las reglas per l'utilisaziun da la lavandaria e procurai adina suenter che Vus avais fatg laschiva che tut saja net. Uschia evitais Vus ch'i dettia dispitas cun autras locatarias e locataris e procurais per ina buna atmosfera en chasa.
• Animals da chasa: Chauns, giats ed auters animals da chasa n'èn betg permess en tut las abitaziuns. As infurmai gia cur che Vus suttascrivais il contract da locaziun, tge ch'è admess.
• Fimar: En bleras chasas èsi scumandà da fimar sin las stgalas, en stanzas communablas u en l'ascensur. I dat er abitaziuns che vegnan dadas en locaziun mo a persunas che na fiman betg.
• Dumondas: Sche Vus avais dumondas, As drizzai il meglier al pedel, a l'administraziun ubain a la locatura u al locatur.