Mintga di chaschunan ils umans nundumbraivlas tonnas rument. La dismessa e la combustiun da quest rument dovra bler temp e chaschuna gronds custs. I dovra collavuraturas e collavuraturs da la vischnanca che rimnan il rument. Cun autos da rument spezials vegn il rument transportà en ils stabiliments per arder ruments, nua ch'il rument vegn destruì. Quai tut chaschuna gronds custs. Pervia da quai pretenda la vischnanca ina taxa per satg da rument.

En la gronda part da las vischnancas vala il princip dal chaschunader. Quai vul dir: Dapli rument che Vus chaschunais e dapli che Vus pajais. U il cas cuntrari: Sche Vus separais e dismettais il rument, vegnis Vus remunerà. Vus stuais cumprar main satgs da rument e spargnais uschia daners.

Ed in ulteriur avantatg impurtant: La gronda part dal rument che vegn separà e suenter dismess po vegnir reciclà. Vus gidais pia er a proteger l'ambient e las resursas natiralas. Tar il recicladi (reutilisaziun da materias primas gia duvradas) occupa la Svizra dal rest ina da las emprimas plazzas sin tut il mund.