Ir cun velo

Ir cun velo

Tge stoss jau observar, sche jau vom cun velo?

En Svizra è il velo in vehichel dumandà. I fa senn da far in'assicuranza da responsabladad per che Vus sajas segirada u segirà en cas che Vus chaschunais donns sco velociclista u velociclist.

L'organisaziun Pro velo Svizra infurmescha sin la pagina d'internet www.pro-velo.ch detagliadamain davart l'equipament, la segirezza dal traffic, las bursas da velos, las infrastructuras e las activitads da temp liber.

Per ir cun velo en il traffic sin via n'èsi betg necessari da far in examen ed er betg d'avair in permiss spezial. Tuttina valan las prescripziuns da traffic che ston esser enconuschentas er a las velociclistas ed als velociclists.

 

La segirezza en il traffic sin via è in tema impurtant er per las velociclistas ed ils velociclists. Faschai adatg che Voss velo saja adina en in stadi pront per il traffic – frains installads correctamain, reflectur e glisch davos, pneus pumpads si e.u.v. E duvrai adina ina chapellina che protegia Voss chau, sche Vus faschais ina cupitga.

 

Tgi che depona ses velo a la staziun u en auters posts da staziunament per velos, duess duvrar ina serra dal velo. Uschia reducis Vus il privel che Voss velo vegnia engulà. En Svizra datti er numerusas staziuns da velo che vegnan servidas e survegliadas da persunal.