L'economia svizra sa distingua tras in aut stadi da svilup. Ella engrazia quai al sistem economic liberal, a la stabilitad politica ed a la stretga colliaziun cun l'exteriur. E natiralmain gidan las forzas da lavur bain scoladas – cun lur lavur fitg qualifitgada – fitg bain ad obtegnair il success.

Il sectur economic il pli grond da la Svizra è il sectur da servetschs cun bancas ed assicuranzas, cun il turissem, cun il commerzi a l'engrossa ed en detagl, cun l'administraziun publica e cun las assicuranzas socialas. Impurtant per l'economia svizra è ultra da quai il sectur industrial cun l'industria da maschinas, l'electroindustria e l'industria da metal, cun l'industria chemica e farmaceutica, cun la tecnica medicinala, cun l'industria da victualias e cun l'industria d'uras. Il sectur economic il pli pitschen è l'agricultura.

L'onn 2017 han ins quintà en Svizra passa 590 000 interpresas da l'economia da martgà. Bundant trais quarts da quellas èn activas en il sectur da servetschs. Passa 99 pertschient da tut las interpresas da la Svizra èn interpresas pitschnas e mesaunas (IPM); quai èn interpresas cun main che 250 collavuraturas e collavuraturs. Circa 89 pertschient èn microinterpresas, pia talas cun main che 10 collavuraturas e collavuraturs. Dus terzs da las persunas occupadas lavuran en IPM, in terz en interpresas grondas. (Funtauna: uffizi federal da statistica, stadi 2017).