Svizra

Religiuns

Tge religiuns datti en Svizra?

Il cristianissem è la religiun la pli derasada en il pajais, represchentà principalmain da la baselgia roman-catolica e protestanta. En ils singuls chantuns dominescha mintgamai ina da las duas confessiuns. L'onn 2017 eran circa 36 pertschient da la populaziun catolics e circa 24 pertschient protestants. Ma i dat anc autras direcziuns religiusas en Svizra. 5,4 pertschient da la populaziun èn muslims, 5,9 cristians ortodoxs ed auters sco er circa 1 pertschient indus, budists e gidieus.

 

Ma durant ils ultims onns èn bleras persunas extradas da las baselgias. Correspundentamain è s'augmentà cleramain il dumber da las persunas senza confessiun. L'onn 2017 era la quota da las persunas senza confessiun 26 pertschient. (Funtauna: uffizi federal da statistica, stadi 2017).

 

Tge signifitga il dretg da libertad da cretta?

En Svizra èn la baselgia ed il stadi separads. Il dretg da libertad da cretta, da conscienza e da cult è francà fermamain en la constituziun federala. Mintga persuna ha il dretg da decider libramain, sch'ella vul esser crettaivla e tge religiun ch'ella vul pratitgar u betg pratitgar.

 

Ins dastga er midar sia cretta u sia religiun, exprimer libramain e viver sias persvasiuns. Quai vala tant per la singula persuna sco er per cuminanzas religiusas. Mintgin ha il dretg d'applitgar – sulet u en ina gruppa – acts da cult, praticas religiusas u rituals.