En Svizra han las burgaisas ed ils burgais in'entira retscha da pussaivladads per influenzar activamain la politica. Quai pertutga tut las persunas che han almain 18 onns, ch'èn maiorennas e ch'èn da naziunalitad svizra. Ils dretgs da burgais ils pli impurtants vegnan declerads curtamain qua sutvart:

• Dretg d'eleger: Mintga quatter onns elegian las burgaisas ed ils burgais lur deputadas e deputads en ils parlaments. Els elegian er las executivas dals chantuns e da las vischnancas. La regenza naziunala percunter na vegn betg elegida dal pievel, mabain dal parlament naziunal.
• Dretg da votar: En votaziuns dal pievel decidan las votantas ed ils votants pliras giadas per onn davart dumondas specificas u davart leschas, e quai sin plaun local, chantunal e federal. En vischnancas pli pitschnas enconuschan ins ultra da quai la radunanza communala. Las burgaisas ed ils burgais sa radunan al lieu, discutan davart dumondas specificas localas e decidan en chaussa.
• Dretg d'iniziativa e da referendum: Cun agid d'ina iniziativa han las burgaisas ed ils burgais la pussaivladad da pretender da midar la constituziun federala. E cun in referendum pon els cuntanscher ch'ins suttamettia conclus dal parlament posteriuramain al pievel per prender la decisiun definitiva. Per ch'ina iniziativa u in referendum saja pussaivel, dovri dentant in tschert dumber da votantas e votants che pretendan quai entaifer in tschert termin tras lur suttascripziun. L'ultim pled ha alura il pievel a la votaziun.
• Dretg da petiziun: Permetta a tut las persunas – pia er a migrantas e migrants – da drizzar supplicas, invitaziuns e recurs formulads en scrit a las autoritads. Quellas n'èn betg obligadas d'interprender insatge sin fundament d'ina petiziun. Ma las autoritads ston almain prender enconuschientscha dal giavisch.