Emprender ina lingua

Emprender ina lingua

Nua poss jau emprender la lingua locala?

Tgi che vul s'integrar en la societad sco migranta u migrant, sto savair communitgar cun ils conumans. Pervia da quai èsi d'ina impurtanza centrala che Vus emprendias la lingua locala. Quai As permetta da chattar ina plazza da lavur, da discurrer en la vita quotidiana cun las vischinas ed ils vischins, cun amias ed amis u cun collegas da la lavur e d'As participar activamain a la vita sociala. Uschia pudais Vus er gidar Voss uffants ad emprender la lingua locala.

 

Emprender ina lingua dovra temp, pazienza e bler exercizi. Spezialmain il cumenzament po esser difficil, ma n'As laschai betg decuraschar da quai. Igl meglier èsi che Vus frequentais ina da las numerusas scolas da lingua; i dat er curs per migrantas e migrants che vegnan subvenziunads da la confederaziun, dal chantun e da las vischnancas en il rom da la promoziun da l'integraziun. Il pretsch per sa participar ad in tal curs è pia reducì. As infurmai davart las purschidas e davart ils pretschs. Emprender ensemen cun auters motivescha e fa dapli plaschair. Vossas enconuschientschas linguisticas pudais Vus meglierar supplementarmain cun communitgar cun autras persunas, cun leger gasettas, texts en l'internet u cudeschs en la lingua locala, cun tadlar radio u cun guardar televisiun.

 

Cussegliaziun en dumondas linguisticas

En il center chantunal d'infurmaziun per l'integraziun a Cuira vegn purschida mintgamai gievgia suentermezdi ina cussegliaziun individuala en dumondas pertutgant il tudestg. Las expertas da lingua sclereschan Vossas cumpetenzas linguisticas e Voss nivel, As mussan vias per emprender la lingua locala ed As cusseglian tge curs da lingua che fiss adattà per Vus. La purschida è gratuita. Vus n'As stuais betg annunziar, ma Vus avais la pussaivladad da fixar in termin.

 

Contact

Contact

  • Center d'infurmaziun per l'integraziun

    Grabenstrasse 17001 Cuira081 257 36 83 / 081 257 26 02www.integration.gr.ch