Il center d'infurmaziun per l'integraziun a Cuira è il post da consultaziun per dumondas davart il tema integraziun e migraziun. Il team dal center d'infurmaziun per l'integraziun As cusseglia ed As infurmescha en connex cun dumondas sco: Jau sun nov en il Grischun e tschertg infurmaziuns per pudair m'arranschar svelt qua? Mes uffant crescha si cun pliras linguas, co al poss jau sustegnair? Nua chat jau in curs da tudestg/rumantsch/talian adattà? Sche Vossa dumonda na pertutga betg il champ da cumpetenza dal center d'infurmaziun per l'integraziun, As vegnan intermediadas las adressas da contact dals posts spezialisads resp. da las persunas spezialisadas correspundentas. Mintga gievgia suentermezdi As stattan ultra da quai a disposiziun cussegliadras da lingua che respundan dumondas pertutgant l'emprender la lingua locala. Supplementarmain a quai datti a l'infoteca ina gronda tscherna da broschuras d'infurmaziun en differentas linguas davart temas impurtants dal mintgadi.

Il center d'infurmaziun ha las suandantas uras d'avertura:

mardi: 14.00 - 16.30

mesemna: 13.30 - 17.00

gievgia: 13.00 - 18.30 (cun cussegliaziun en dumondas linguisticas)

En il center chantunal d'infurmaziun per l'integraziun a Cuira vegn purschida mintgamai gievgia suentermezdi ina cussegliaziun individuala en dumondas pertutgant il tudestg. Las expertas da lingua sclereschan Vossas cumpetenzas linguisticas e Voss nivel, As mussan vias per emprender la lingua locala ed As cusseglian tge curs da lingua che fiss adattà per Vus. La purschida è gratuita. Vus n'As stuais betg annunziar, ma Vus avais la pussaivladad da fixar in termin.