En Svizra datti in sistem d'assicuranzas socialas bain sviluppà. El duai garantir a la persuna assicurada in standard da vita adequat en la vegliadetgna sco er la protecziun en cas d'invaliditad, en cas da malsogna ed en cas d'accident. Ultra da quai porscha el ina garanzia finanziala per persunas parentas, sche la persuna assicurada mora. Ulteriuras assicuranzas cuvran las ristgas sco malsogna, accident, dischoccupaziun, maternitad e famiglia.

Las prestaziuns dals singuls secturs d'assicuranza vegnan finanziads en emprima lingia tras contribuziuns da l'activitad da gudogn. Quai vul dir, las contribuziuns vegnan deducidas directamain dal salari da las emploiadas e dals emploiads. Ed er patrunas e patruns, persunas cun in'activitad da gudogn independenta sco er persunas senza activitad da gudogn pajan contribuziuns. L'assicuranza da malsauns è obligatorica en Svizra e vegn finanziada tras contribuziuns (premias) da las singulas persunas assicuradas. Cunquai che l'autezza da questas contribuziuns na dependa betg da las entradas, conceda il chantun a persunas cun entradas modestas contribuziuns da sustegn (=reducziun individuala da las premias).

La confederaziun ed ils chantuns sa participeschan ultra da quai cun differentas summas er a la finanziaziun da las assicuranzas socialas (cun excepziun da l'assicuranza cunter accidents e da la prevenziun professiunala).

Il sistem da las assicuranzas socialas per la vegliadetgna è la segirezza sociala la pli impurtanta en Svizra e sa basa sin in princip da trais pitgas:

• L'assicuranza per vegls e survivents (AVS)
• La prevenziun professiunala (cassa da pensiun)
• La prevenziun da vegliadetgna voluntara (3. pitga)