Da princip è mintga persuna sezza responsabla per la garanzia da sia existenza. Umans che sa chattan en ina situaziun finanziala d'urgenza transitorica u permanenta e che na pon – malgrà agens sforzs – betg superar quella han il dretg da survegnir agid social. La premissa per quai è che la persuna pertutgada haja ses domicil en il chantun Grischun.
L'agid social vegn concedì, sch'i na dat nagin dretg da survegnir autras prestaziuns legalas, sco per exempel la renta d'invaliditad, e sche la famiglia u persunas singulas na pon betg finanziar lur vita. Las prestaziuns d'agid social vegnan calculadas en mintga cas en moda individuala ed èn dependentas da las relaziuns persunalas, dals custs da viver, da las entradas sco er da lur durada.
La calculaziun vegn fatga sin basa da las disposiziuns chantunalas e da las recumandaziuns da las vischnancas sco er sin basa da las directivas da la conferenza svizra da l'agid social. En il chantun Grischun decidan las vischnancas davart la concessiun da prestaziuns d'agid social.
