La scursanida AVS stat per assicuranza per vegls e survivents. Ella è vegnida introducida l'onn 1948 ed è l'assicuranza sociala la pli impurtanta en Svizra.
Cun las rentas da vegliadetgna gida la AVS a garantir a las persunas assicuradas in temp da pensiun segirà materialmain suenter ch'ellas sortan da la vita professiunala. La vegliadetgna da pensiun cumenza en Svizra per dunnas cun 64 onns e per umens cun 65 onns (stadi dal schaner 2016). Grazia a las rentas per survivents gida la AVS er ch'ils conjugals ubain ils uffants na vegnan betg en miseria finanziala suenter la mort da la nutridra u dal nutrider.
La AVS sa basa sin l'idea fundamentala da la solidaritad. La populaziun che lavura finanziescha mintgamai las rentas currentas e sa fida che generaziuns futuras vegnian a far il medem. L'assicuranza è obligatorica per tut las persunas a partir da 18 onns che vivan en Svizra e che han in'activitad da gudogn. Finanziada vegn la AVS tras las contribuziuns da las lavurantas e dals lavurants che vegnan deducidas dal salari, tras las contribuziuns da las patrunas e dals patruns, da la confederaziun e dals chantuns.
Tgi ch'è curt avant il pensiunament, duess s'annunziar 3 fin 4 mais avant ch'ella u el cuntanscha la vegliadetgna da pensiun tar la cassa da cumpensaziun responsabla. En cas da dumondas gidan las agenturas communalas da las cassas da cumpensaziun vinavant.
