En Svizra èn acceptadas differentas furmas da convivenza. Blers pèrs vivan ensemen senza esser maridads (concubinat) ed han er uffants ensemen. Per quests pèrs datti la pussaivladad da far in contract da concubinat. En quel po per exempel vegnir reglà tge che tutga a tgi u co ch'ils custs dal tegnairchasa vegnan repartids. Sch'ils partenaris portan cun sai en la famiglia uffants d'ina relaziun da pli baud, alura discurran ins d'ina famiglia da patchwork. La repartiziun da las rollas e da las incumbensas tranter dunna ed um è flexibla.

Pèrs da la medema schlattaina èn acceptads en Svizra ed els han la pussaivladad da laschar registrar lur partenadi. Tras quai s'acquistan ils partenaris dretgs ed obligaziuns. Sin la pagina d'internet ch.ch chattais Vus ina survista da las consequenzas persunalas e finanzialas las pli impurtantas, sch'in partenadi da la medema schlattaina vegn registrà. L'uffizi da stadi civil responsabel da Vossa vischnanca da domicil As infurmescha davart las premissas che ston vegnir ademplidas e davart ils pass che ston vegnir fatgs.