En Svizra ston ins avair 18 onns per pudair maridar. I vegnan reconuschidas mo lètgs che vegnan concludidas d'in uffizi da stadi civil. Sin la pagina d'internet ch.ch chattais Vus ina survista da las consequenzas persunalas e finanzialas las pli impurtantas d'ina maridaglia. L'uffizi da stadi civil responsabel da Vossa vischnanca da domicil As infurmescha davart las premissas che ston vegnir ademplidas e davart ils documents ch'èn necessaris.

En Svizra han conjugals (dunna/um) tenor lescha ils medems dretgs e las medemas obligaziuns, perquai ch'els èn legalmain eguals. I dat er il dretg da la libra tscherna dal partenari resp. da la partenaria. Famiglias ed ulteriuras persunas n'han pia nagin dretg da sfurzar dunnas u umens da maridar cunter lur voluntad. Tgi che sa senta sfurzà ad ina maridaglia, po sa drizzar ad in post da cussegliaziun spezialisà.

L'organisaziun zwangsheirat.ch porscha gratuitamain cussegliaziun, accumpagnament e sustegn a dunnas, ad umens ed a giuvenils ch'èn pertutgads d'ina maridaglia sfurzada. Ils discurs e las indicaziuns vegnan tractads en moda strictamain confidenziala. Il numer dal telefon d'agid è 0800 800 007.