Sa participar activamain ad in'uniun vul dir divertiment e cumpagnia. Ed ins ha il bun sentiment da far chaussas raschunaivlas ed utilas. Betg mo persunas svizras s'engaschan en uniuns, mabain er adina dapli migrantas e migrants. Là pudais Vus meglierar Vossas enconuschientschas da la lingua locala ed emprender d'enconuscher glieud cun ils medems interess. Cun il temp s'engrondescha l'atgna rait da relaziuns, ed ins è francà meglier en la vischnanca u en il quartier.

En bleras vischnancas datti er purschidas sco gimnastica per mammas e pitschens (gimnastica ma-pi), gimnastica per persunas attempadas, chors, uniuns da gimnastica da dunnas e d'umens. Las purschidas e las uniuns stattan a disposiziun a tut las persunas interessadas. Dumandai Vossa vischnanca da domicil tge differentas purschidas ch'i dat ed As faschai dar las datas da contact. Numerusas vischnancas han plinavant publitgà en l'internet ina glista da las uniuns. Ins po tschertgar las uniuns tenor tematica u tenor alfabet, ins chatta las infurmaziuns da contact e vesa savens er, tge occurrenzas che las uniuns han planisà.

Sche Vus vulessas vegnir a savair dapli davart in'uniun, lura faschais il meglier da gist telefonar a la persuna da contact inditgada u da scriver in e-mail. La gronda part da las uniuns s'allegra dad interessentas ed interessents.

En il chantun datti er in grond dumber d'uniuns da migrantas e migrants. Infurmaziuns survegnis Vus tar Vossa vischnanca u sin la pagina d'internet www.integration.gr.ch sut Kurse/Angebote.