Vita sociala e culturala

Vita sociala e culturala

Co poss jau ma participar a la vita sociala e culturala?

Per s'integrar e per sa sentir bain en Svizra èsi impurtant da sa participar a la vita sociala e culturala. En la gronda part da las vischnancas datti numerusas occurrenzas culturalas, saja quai exposiziuns e referats, represchentaziuns da teater e concerts. Las occurrenzas èn per part gratuitas e libramain accessiblas. Il meglier faschais Vus d'As infurmar tar Voss collegas da lavur, enconuschents, parents, amis e vischins.

 

Plinavant datti en ils quartiers ed en ils vitgs lieus d'inscunter, sco per exempel plazzas da giugar, parcs e bogns publics, nua ch'ins po entrar en contact cun autras persunas.

 

La Svizra vala er sco pajais da las uniuns. Blera glieud s'engascha en in'uniun per pratitgar in hobi cuminaivel. Uniuns datti en tut las spartas pussaivlas: musica, sport, cultura, natira e bler auter. Per il solit pajan ins ina contribuziun annuala per daventar commember e per pudair trair a niz las purschidas.

 

Visitar occurrenzas culturalas u far part d'ina uniun èn bunas pussaivladads per emprender d'enconuscher glieud e per vegnir a savair a medem temp dapli davart la societad svizra e davart il pajais. Uschia pudais Vus er meglierar Vossas enconuschientschas da la lingua locala, engrondir la rait da relaziuns ed As francar meglier en la vischnanca.