Circa in quart da la populaziun en Svizra sa participescha ad engaschaments instituziunalisads da lavur voluntara. Questas persunas lavuran pia voluntarmain en il servetsch da la societad e na dumondan nagina paja per lur lavur. Ins numna quai lavur voluntara.

Ils engaschaments da lavur vegnan organisads tras uniuns u tras corporaziuns caritativas, politicas u publicas. Lavur voluntara chattan ins sin il champ da la cultura, da l'ambient, dal sport, da la politica, en l'agid da buna vischinanza, en secturs socials ed ecclesiastics ed anc en blers auters secturs da nossa societad.

En il rom da la lavur voluntara pon las uniuns e las organisaziuns emetter per lur commembras e commembers ina cumprova davart l'engaschament voluntar prestà. Qua tras mussan ellas che la lavur da las persunas voluntaras è impurtanta e vegn stimada.

Ils engaschaments prestads pon vegnir nudads sin in fegl da survista e mess en salv ensemen en ina mappa cun las cumprovas da l'uniun u da l'organisaziun. Uschia pon ins render visiblas las abilitads e las cumpetenzas acquistadas. La lavur voluntara survegn dapli valur ed è cumparegliabla cun la lavur pajada. Ins po er trair a niz il dossier, sch'ins tschertga ina plazza, pertge che collavuraturas e collavuraturs engaschads vegnan stimads dapertut.