Il pli impurtant è Voss interess per la scola e per quai che Voss uffant emprenda. Dumandai perquai Vossa figlia u Voss figl uschè savens sco pussaivel: «Co has gì oz en scolina / en scola?» Ubain: «Tge avais fatg?» Prendai il temp per tadlar Voss uffant. As allegrai cun Voss uffant, sch'el ha gì in success, ed al encuraschai, sch'insatge è anc difficil.

Procurai che Voss uffant fetschia suenter scola regularmain (al medem lieu ed a las medemas uras) e nundisturbadamain sias lezias e ses pensums (senza televisiun u radio).

Guardai che Voss uffant giaja a temp a letg e ch'el saja sa recreà la damaun. Guardai er che Voss uffant mangia insatge la damaun e ch'el prendia cun sai en scola ina marenda sauna. Uffants che guardan savens televisiun u che dattan savens gieus al computer pon survegnir problems da concentraziun. Mettai perquai cunfins – per amur da Voss uffant.

Il mund da la scola ed il mund da la famiglia pon esser fitg differents. Alura èsi mintgatant difficil per ils uffants da metter sut in tetg las reglas e las valurs da quests dus munds. Perquai èsi impurtant ch'ils geniturs, las persunas d'instrucziun e las persunas d'assistenza hajan contact e collavurian in cun l'auter. Sche la collavuraziun tranter las persunas creschidas funcziuna bain, po l'uffant sa concentrar pli tgunsch sin la scola e sin l'emprender.