A la fin da mintga semester survegnan las scolaras ed ils scolars en il chantun Grischun in attestat da notas che po vegnir cumplettà cun in rapport individual davart l'emprender. Il rapport davart l'emprender infurmescha davart il stadi actual da la cumpetenza da la materia sco er davart aspects impurtants dal cumportament d'emprender e da lavurar e dal cumportament social. Las scolaras ed ils scolars da la 1. e 2. classa primara pon vegnir giuditgads ubain cun in attestat da notas u da pleds ubain cun in rapport davart l'emprender.

Las notas da l'attestat van dad 1 fin 6.

Las notas signifitgeschan:

1 = fitg debel

2 = debel

3 = insuffizient

4 = suffizient

5 = bun

6 = fitg bun

En l'attestat pon er star mesas notas, per exempel 4–5 u 5–6.

Ils geniturs ston suttascriver l'attestat e l'uffant sto puspè purtar enavos l'attestat en scola.

A la fin da l'onn da scola decida la persuna d'instrucziun da classa davart la promoziun da la scolara u dal scolar en la proxima classa pli auta (promoziun). Per quest intent consultescha ella autras persunas d'instrucziun. Per la decisiun vegni guardà, quant enavant che la scolara u il scolar ha cuntanschì las finamiras da l'instrucziun e co che ses cumportament social, d'emprender e da lavurar guarda or.

Igl è usità che la persuna d'instrucziun maina discurs cuminaivels cun ils geniturs e cun l'uffant avant che prender la decisiun da promoziun.