Educaziun

Dumondas d'educaziun

Nua poss jau m'infurmar davart dumondas d'educaziun?

Explicaziuns simplas cun blers cussegls porschan las «Brevs da la Pro juventute als geniturs». Davent da la naschientscha fin al 6. onn da vita survegnis Vus regularmain infurmaziuns che sa refereschan a la vegliadetgna ed als pass da svilup actuals da l'uffant. Bleras vischnancas sustegnan questa purschida e tramettan als geniturs las brevs da la Pro juventute. Las brevs pon dentant er vegnir abunadas directamain tar la Pro juventute.

 

Per geniturs da lingua estra ha la Pro juventute sviluppà la broschura «Noss uffant» en albanais, bosniac/croat/serb, englais, portugais, spagnol, tamil e tirc. Er questas broschuras cumpiglian il temp davent da la naschientscha fin al 6. onn da vegliadetgna, mintgamai cun ina broschura per onn.

 

I dat differentas occurrenzas e curs davart temas da l'educaziun, per exempel per pèrs ch'èn gist daventads geniturs, per geniturs ch'educheschan sulets, per geniturs da lingua estra u per geniturs cun giuvenils. La furmaziun da geniturs rinforza e promova ils geniturs en quai che reguarda lur enconuschientschas davart l'educaziun e lur relaziun envers l'uffant.

 

Forsa essas Vus a chasa suletta u sulet cun Voss uffant ed avais dumondas concretas. U Vus avais mo pauc temp liber. Ina cussegliaziun directa al telefon – per part er en Vossa lingua – po lura esser nizzaivla. En l'internet datti er forums online per geniturs. Là chattais Vus ina resposta extendida a bleras dumondas. Plinavant han revistas da famiglias en l'internet per part fitg bunas rubricas da servetsch cun infurmaziuns impurtantas.