Tscherna da professiun

Emprender ina professiun

Co emprendan ins ina professiun?

Suenter la scola absolvan circa dus terzs dals giuvenils en Svizra in emprendissadi. Quel dura tut tenor la professiun 3 u 4 onns. Cur che las emprendistas ed ils emprendists han terminà l'emprendissadi cun success, survegnan ellas ed els in attest federal da qualificaziun. Scolaras e scolars cun prestaziuns pli deblas pon far in emprendissadi da 2 onns che vegn terminà cun l'attest federal da furmaziun professiunala.

 

Il tratg particular da la furmaziun professiunala en Svizra è la cumbinaziun da scola e pratica da lavur. Ins numna quai il sistem dual. Las emprendistas ed ils emprendists lavuran per regla durant 4 dis per emna (en tschertas professiuns er durant pli paucs dis) en in manaschi d'emprendissadi, nua ch'els acquistan las enconuschientschas praticas. Ils ulteriurs dis da l'emna frequentan ellas ed els ina scola professiunala spezialisada, nua ch'ellas ed els emprendan la teoria.

 

Emprendistas ed emprendists cun talents en scola pon frequentar supplementarmain l'instrucziun en ina scola da maturitad professiunala e far ina maturitad professiunala. L'instrucziun po vegnir visitada gia durant l'emprendissadi u suenter quel. Emprendistas ed emprendists cun in attest da maturitad professiunala han pli tard la pussaivladad da frequentar ina scola auta spezialisada.