En la vita datti adina puspè situaziuns difficilas cun la famiglia, en ils conturns persunals u a la plazza da lavur. Malsognas psichicas sco per exempel depressiuns èn fitg frequentas. Mintga terza persuna patescha d'ina tala malsogna ina giada en sia vita. Persunas pertutgadas han per exempel adina puspè temas u pateschan d'ina tristezza paralisanta durant in temp pli ditg. Savens n'èsi betg pussaivel da vegnir a fin cun questas situaziuns senza agid professiunal.
Malsognas psichicas èn dretgas malsognas che ston vegnir tractadas. Psicologs u psichiaters (medis spezialisads per l'olma da l'uman = psica) As pon accumpagnar e sustegnair en talas fasas da la vita. Ils psicologs tschertgan novas vias ensemen cun ils pazients en discurs u en ina terapia. Uschia po vegnir meglierada la situaziun.
Sche Vus duvrais agid, pudais Vus er discurrer l'emprim cun Voss medi da chasa. El As po intermediar ina persuna dal fatg. L'assicuranza da basa da la cassa da malsauns paja in tractament mo, sche quel vegn fatg d'in medi (psichiater).
Tut ils cussegliaders e tut las spezialistas psicologicas èn suttamessas a l'obligaziun da discreziun e na dastgan dar vinavant naginas infurmaziuns davart Vossa persuna.
