In medi da chasa è in medi generalist e surpiglia l'emprim tractament, sche Vus essas malsaun. Els èn scolads per la prevenziun e per tractar tut il corp. In medi da chasa As enconuscha bain grazia a las visitas regularas ed As po cussegliar optimalmain. Perquai èsi meglier, dad ir adina tar il medem medi da chasa.

D'avair in medi da chasa ha anc in avantatg: Sche Vus essas malsaun, pudais Vus telefonar da tut temp a la pratica da Voss medi ed er fixar en moda pli simpla termins a curta vista. Tar bleras cassas da malsauns è ultra da quai la premia pli favuraivla, sche Vus avais in medi da chasa.

I dat differentas vias per chattar in medi: Dumandai amias ed amis ed enconuschentas ed enconuschents, tschertgai en il cudesch da telefon (ils medis èn mess en urden tenor il lieu/il quartier e tenor il sectur spezial) u As infurmai en l'internet.