Mintgatant dovran umans en ina crisa immediatamain in cussegl. In agid immediat porscha l'organisaziun Il maun offert. Ella porscha cussegliaziuns gratuitas per telefon, per e-mail u per chat (www.143.ch). Sut il numer 143 pon ins telefonar en situaziuns da crisa e discurrer cun ina collavuratura u cun in collavuratur: Els taidlan tiers e pon er gidar tar la dumonda co ch'i duai ir vinavant. Il maun offert è in post da consultaziun per tuts ed è suttamess ad in'anonimitad absoluta.

En l'internet datti er ina cussegliaziun speziala per giuvenils. Ina pagina d'internet nizzaivla è per exempel www.lilli.ch. Ella infurmescha en moda seriusa davart temas che interessan giuvenils, dunnas giuvnas ed umens giuvens: per exempel relaziuns, sexualitad, cuntracepziun u violenza. Ins po tschentar sez dumondas u leger, tge che auters han dumandà. Uffants e giuvenils che han dumondas u che dovran agid pon er sa drizzar per telefon 147, per SMS 147 u en in chat 147 al post da cussegliaziun da la Pro juventute. Ulteriuras infurmaziuns davart la purschida sa chattan sin la pagina d'internet www.147.ch.

Mintgatant èn geniturs surdumandads cun lur uffant, en ina crisa u en ina situaziun engrevgianta. Per els datti il post da cussegliaziun clom d'urgenza per geniturs. El è cuntanschibel di e notg sut il numer 0848 35 45 55. Tar il clom d'urgenza per geniturs èsi er pussaivel da fixar in termin per ina cussegliaziun d'educaziun. Infurmaziuns en chaussa chattais Vus er sin la pagina d'internet: www.elternnotruf.ch