Viver saun

Alimentaziun

Co poss jau ma nutrir en moda sauna?

In'alimentaziun sauna e bler moviment èn impurtants. Tras quai sa sent'ins meglier ed ins po sa proteger uschia cunter malsognas. Uffants dovran in'alimentaziun sauna en spezial per lur svilup. Ma tge è atgnamain in'alimentaziun sauna ed equilibrada? Questas victualias recumondan cussegliadras e cussegliaders da nutriment per di:

  • Liquids: Baiver 1 fin 2 liters è ideal. Il meglier aua minerala, aua da la spina, tés da fritga e dad ervas senza zutger. Betg baiver memia bavrondas cun cafein sco café, té nair u verd.
  • 5 purziuns verdura e fritgs en differentas colurs, crivs u cotgs. Er suc da fritgs betg zutgerà tutga vitiers.
  • 3 purziuns products da graun (p.ex. paun, sche pussaivel da graun integral), pasta, ris, tirc u auters products sco tartuffels e leguminosas (p.ex. chicras, lentiglias).
  • 1 purziun albumins sco p.ex. charn, pesch, ovs, chaschiel, tofu u quorn.
  • 3 purziuns products da latg, p.ex. 2 dl latg, 180 g jogurt e 60 g chaschiel.
  • Pauc ieli u grass per cuschinar. Spezialmain saun è l'ieli da ravun u d'ulivas.
  • Mo en quantitads pitschnas: dultschims (tschigulatta, turta), snacks salads (chips), bavrondas dultschas (cola) ed alcohol. Persunas spezialisadas recumondan che uffants na duessan baiver naginas bavrondas d'energia che cuntegnan cafein.