Durant ils dis suenter la naschientscha duai la mamma sa remetter corporalmain e psichicamain. En questa emprima emna (pagliola) vegnan la mamma e l'uffant tgirads medicinalmain. L'assicuranza da basa da la cassa da malsauns paja ils custs da las visitas durant la gravidanza, durant la naschientscha e da l'assistenza durant la pagliola. La cassa da malsauns surpiglia er tscherts custs da la preparaziun da la naschientscha e da la cussegliaziun per mammas che tezzan.

Per l'emprim temp a chasa suenter la naschientscha porscha la cussegliaziun per mammas, babs e geniturs sustegn en cas da dumondas davart l'alimentaziun, davart il svilup e davart l'educaziun da l'uffant. As infurmai tar Vossa vischnanca da domicil u sin la pagina d'internet da la cussegliaziun per mammas e per babs dal Grischun davart la purschida correspundenta en Vossa regiun. Ultra da quai datti la pussaivladad da tschentar las dumondas er per telefon u sur in formular online.