Preparai il cudeschet da famiglia e la quittanza dals documents deponids. L'administraziun da l'ospital dovra quests documents per annunziar l'uffant tar l'uffizi da stadi civil.

Las ultimas emnas avant la naschientscha è er l'ultim mument per tscherner il prenum da Voss uffant. L'ospital spetga che Vus sappias gia il num da l'uffant.

Assicurai Voss uffant tar la cassa da malsauns gia avant sia naschientscha. Uschia na stuais Vus betg emplenir in questiunari da sanadad e Voss uffant po profitar d'ina protecziun senza resalvas.

Sch'ils geniturs n'èn betg maridads, sto il bab renconuscher l'uffant. Quai vul dir ch'el sto laschar s'inscriver sco bab tar l'uffizi da stadi civil. Suenter la naschientscha vegnan geniturs betg maridads ultra da quai contactads da l'autoritad tutelara. Quella garantescha ch'ils pajaments da mantegniment da l'uffant èn reglads.