Tgi che ha fatg debits e percorscha ch'ella u el n'ha betg pli sut controlla sias finanzas, sto agir svelt e dumandar agid tar ina cussegliaziun professiunala da debits. Pli baud ch'ins fa la dumonda e meglier ch'igl è. Pli ditg ch'ins spetga e pli gronds ch'ils debits vegnan e pli grondas che las eventualas difficultads èn.

Posts da cussegliaziun da debits d'utilitad publica datti en differents chantuns. Servetschs socials da las vischnancas e da las baselgias èn ulteriurs posts da consultaziun. La cussegliaziun da debits As gida l'emprim a survegnir ina survista davart Vossa situaziun finanziala. Sin basa da quai vegn alura elavurà cun Vus in budget per sanar Voss debits. Las cussegliadras ed ils cussegliaders sa mettan en contact er cun quellas persunas, tar las qualas Vus avais debits (credituras e crediturs). Quellas e quels vegnan supplitgads da suspender il termin da pajament dals debits durant la fasa da scleriment (pajar pli tard ils quints averts, pajament en ratas).