Ensemen cun il quint survegnis Vus per regla in cedel da pajament. Quel duvrais Vus per pajar il quint. El cuntegna tut las infurmaziuns impurtantas sco il num dal retschavider, il conto, l'import dal quint, il numer da referenza e.u.v.

I dat pliras pussaivladads da pajar Voss quint:

Al spurtegl da posta pudais Vus consegnar ils cedels da pajament emplenids e pajar l'import en daner contant ubain laschar retrair l'import da Voss conto da posta. Per mintga pajament survegnis Vus ina quittanza ubain ina notizia en il "cudeschet da posta" mellen. Vus pudais er emplenir ina incumbensa da pajament e la trametter ensemen cun ils cedels da pajament per posta a Vossa banca che fa alura l'assegn. Ulteriuras pussaivladads èn il pajament sur e-banking u l'utilisaziun d'ina applicaziun mobila da banca u da postfinance.

Per facilitar il traffic da pajaments datti er la procedura da debitaziun directa e l'incumbensa permanenta. Uschia pudais Vus pajar automaticamain quints che sa repetan periodicamain, sco per exempel il tschains da locaziun, il quint da telefon u il quint da la cassa da malsauns. As infurmai tar Vossa banca u tar la posta.