Sco las Svizras ed ils Svizzers èn er las migrantas ed ils migrants obligads da pajar taglia. Ins paja taglia tant a la vischnanca sco er al chantun, nua ch'ins abita. Quai è la taglia communala e chantunala. Ultra da quai pajan ins er taglia a la confederaziun, l'uschenumnada taglia federala directa.

Il sistem fiscal è organisà uschia, che la gronda part da las persunas emplaina ina giada per onn ina decleraziun da taglia. Ellas inditgan en quella, quant ch'ellas han gudagnà l'ultim onn e quant gronda che lur facultad è. La decleraziun da taglia vegn alura inoltrada tar las autoritads da taglia localas. Quellas calculeschan l'import da taglia e fan il quint respectiv.

En Svizra enconuschan ins er anc la taglia a la funtauna. Ella vegn pajada directamain da la patruna u dal patrun da la persuna ch'è obligada da pajar taglia. Ella u el deducescha la taglia mintgamai dal salari e assegna l'import a las autoritads da taglia. Pertutgadas da questa taglia èn migrantas e migrants senza permissiun da domicil C, sch'ellas u els n'èn betg maridadas u maridads cun ina persuna che posseda questa permissiun u che ha il dretg da burgais svizzer. La taglia a la funtauna è differenta da chantun a chantun, ella po sa midar mintga onn.

Per evitar che las migrantas ed ils migrants stoppian pajar duas giadas taglia – en Svizra e supplementarmain en lur pajais d'origin – ha la Svizra fatg cunvegnas davart l'imposiziun dubla da taglia cun passa 100 pajais. Questas cunvegnas èn er fitg impurtantas en connex cun l'omissiun fiscala.