Tgi che vul profitar dals servetschs d'ina banca u da postfinance, dovra in conto. I dat plirs geners da contos cun differents intents d'utilisaziun, differents tschains e differentas spesas. Las spesas pudais Vus dal rest reducir, sche Vus pretendais main extracts dal conto u sche Vus duvrais l'e-banking.

Per avrir in conto, stuais Vus ir tar la banca che Vus tschernis u tar la posta e laschar l'emprim As cussegliar davart las pussaivladads. Sche Vus avais decidì e vulais avrir in conto, stuais Vus preschentar in document d'identitad. Prendai perquai cun Vus il passaport ed il document da legitimaziun da persunas estras – e sche necessari in agid da translaziun. Planisai avunda temp per avrir in conto.