En cas da stretgas finanzialas pari dad esser attractiv da prender si in credit da consum e da finanziar cun quel per exempel in nov auto u las proximas vacanzas. Ma attenziun: Credits da consum e credits privats èn chars, damai che las bancas pon pretender in tschains annual da fin a 15 pertschient.

I dat situaziuns, nua ch'in credit da consum po esser senz'auter ina soluziun transitorica raschunaivla. Dal consum permanent sin credit vegni dentant recumandà urgentamain da desister! Vus engrevgiais uschia Voss budget per il tegnairchasa sur in temp pli lung, quai ch'è spezialmain lura problematic, sch'ins perda la lavur.

Las purschidas da credits da consum èn fitg differentas. I vala la paina da las cumparegliar exactamain e da calcular tras ils custs, avant ch'ins prenda la decisiun. Examinai er las alternativas: In emprest da daners da persunas parentas u d'amias e d'amis po esser bler pli favuraivel. U che Vus decidais da spargnar e da far la cumpra pir, cur che Vus As pudais prestar quai. Quai è il pli favuraivel e procura gist anc per bler plaschair anticipà.